【明報專訊】「陳嘉銘，你嗰邊好似好危急喎！」

「唔係呀，鄭俙璇，其實我哋呢邊有個海上招聘會，係東非    索馬里海盜唔夠人手，公開招聘多啲員工，希望可以騎劫多啲裝有原油嘅艦隻，增加贖金收入。香港勞工處    已經派員了解，希望佢哋可以招聘失業嘅市民；有消息話，唔少香港市民已經起程前往索馬里，打算投身海盜事業。有市民更加話，海盜十日之內已經喺印度    洋劫足一億美元    ，收入一定比喺香港打工更好；有市民亦已經想到，如果騎劫到油輪，一定會開出『油價由香港話事』嘅條件，算係對香港有啲貢獻。」

「咁樣做唔係鼓勵咗海盜咩？海盜行動都可能觸犯基本法    喎。」

「都唔係嘅，嗰度係印度洋，基本法係無效，所以都幾有自由。不過，曾蔭權    都擔心，咁做會令國際社會以為香港鼓勵犯法，所以特區政府    亦都成立咗印度洋海上治安隊，聘請失業嘅香港市民，一齊打擊海上非法活動。特區政府相信，會有大量市民出海做海盜，亦有唔少市民搞海上治安，到時有賊劫船，有人捉賊，海上事業一定會非常繁忙，亦唔會再有太多人話冇嘢做。有專家話，以前唔少人靠海上經商發展香港，今日有人靠海上騎劫振興經濟，都可以話海運暢旺。」

「咁樣靠海盜事業發展，係唔係可以解決晒香港失業問題呢？」

「索馬里海盜表示，雖然暫時估計唔倒香港有幾多人好似佢哋一樣冇飯食，但係佢哋唔介意有人出海搶佢哋飯碗。有地理學者就話，個海咁大，即使一次過有好多人出海，海面都可以負荷，唔會造成海嘯。據估計，香港失業率會突破5%，如果呢5%嘅人一齊衝出海做海盜，真係可以一次過解決失業問題。而家最擔心嘅係，運油出海嘅人，都轉行做海盜，令海盜冇嘢好劫，冇工開；不過特區政府話唔駛擔心，因為大大小小建築工程已經預備好，到時打劫唔成都可以上岸修路。」

P.S. 市道咁差 都唔知出年畢業揾咩工 又或者咩工都揾唔到 ~ 海盜呢一行 睇黎都不俗 分分鐘咁就一世 ~ 都要學吳唱K講番句「我偶像係Johnny "Deep" 佢係賣飛佛」